बाँच्ने कला

नाम र दाम कमाउने रहर त थियो होला तर कुन्नि किन त्यो बाटै लागिएनछ । पैसा कमाउन नसक्ने व्यक्तिको परिवारमा खासै अर्थ नहुनु अस्वाभाविक हैन । नाम कमाउन नसकेको मान्छेलाई समाजले सम्झने कारणै हुँदैन। विलास के हो थाहै भएन । उमेर छँदा पनि विलासको पछि लागिएन । उमेर ढल्केपछि विलास कतिपय अर्थमा त उपहास हुनपुग्दो रहेछ ।
पैसा कमाएर कम्तीमा परिवारमा महत्व स्थापित गर्न अब न समय छ, न कमाउने सीप । न त्यसका लागि परिश्रम गर्न आवश्यक शारीरिक, मानसिक र बौद्धिक क्षमतै छ । नाम कमाउन पनि अब थालेको प्रयासले पुग्दैन। आफूसँग समाजलाई दिनसक्ने केही छैन । भोगविलास त शरीरले धान्नै सत्तै्कन। न मन लागेको खानै हुन्छ न मन लागेका ठाउँमा जानै सकिन्छ । शरीरका कतिपय आवश्यकता त झन् त्यसै हराएर जाने रहेछन् ।
जीवनको यस अर्थहीनतासँग कसरी तालमेल मिलाउने?  बाँच्ने कला नजानेर पो यसो भएको हो कि? कतै सिक्न सकिएला बाँच्ने कला ?