घर बनाउने पैसा

भूकम्पपीडितलाई घर बनाउन सरकारले दिने भनेको २ लाख अनुदानले स्थायी घर बनाउन पुग्दैन । त्यसमाथि सरकारी मापदण्ड पनि पूरा गर्नुपर्छ । अतिगरिबहरूका लागि यो पैसा निल्नु न ओकल्नु हुनसक्छ ।

यो गोरखाको देउराली गाउँ विकास समितिमा भुइँचालोपछि बनाइएको घर हो । मझुवाबाट पैदल देउराली गाउँ जाने बाटामा सात दाेबाटाे नपुग्दै बनेलीमा यो घर बनाइएको छ ।  घर बनाउन काठबाहेक २ लाखभन्दा केही बढी लागेको थियो रे ! मोटरबाटो नजिकै र गाउँकै कर्मीहरूले बनाएकाले यो घर सस्तोमा बन्यो भन्छन् स्थानीय व्यक्ति । बाँसको चिम लगाएको यो घर बढीमा १० वर्षसम्म टिक्ला ।
यसमा २ वटा कोठा छन् । भान्साका लागि अलग्गै ठाउँ बनाउन खोजिएको छ । सानै परिवारका लागि पनि ठाउँ पुग्दैन । संयुक्त परिवारको त झन् कुरै भएन । घरमा भान्साका लागि ठाउँ पनि चाहिन्छ । परिवारमा अपाङ्गता भएका व्यक्ति भएमा केही सुविधा थप गर्नुपर्छ । यसैले २ लाख रुपियाँले घर बन्दैन ।
सरकारले अनुदान थप नदिने हो भने सहुलियत दरमा दीर्घकालीन ऋण सापटी सहजरूपमा दिनुपर्छ । नत्र घर बनाउन पैसा लिएर हिनामिना गर भनेजस्तो हुन्छ ।
अहिले पुनर्निर्माणमा अलिकति इमानदार र लगनशील हुनसके पैसा जुटाउन उति कठिन नहोला तर अरू बेला सहायता लिन र अनुदान दिन सजिलो हुँदैन । यसैले २ लाखको राशि बढाउन र कार्यान्वयनका क्रममा गरिबमुखी नीति अपनाउन सम्बन्धितहरूको बुद्धि पुगोस् ।